Bjargfuglavöktun á Vestfjörðum

Starfsmenn Náttúrustofunnar störtuðu fuglavinnu sumarsins með uppsetningu eftirlitsmyndavéla við Látrabjarg. Myndavélar á Látra- og Hornbjargi eru notaðar við Bjargfuglavöktun en á hverri klukkustund taka vélarnar mynd af sama hluta bjargsins og fuglunum sem þar eru. Myndir alls sumarsins eru síðan settar saman með sérstöku forriti og fjöldi varppara á þeim stað áætlaður. Myndirnar eru því góð viðbót við aðrar talningar sem gerðar eru í björgunum.

Í Bjargfuglavöktuninni er árlega fylgst með stofnum langvíu (Uria aalge), stuttnefju (Uria lomvia), álku (Alca torda), ritu (Rita tridactyla) og fýls (Fulmarus glacialis). Náttúrustofa Vestfjarða hefur unnið við talningar bjargfugla frá árinu 2009 en einnig séð um eftirlitsmyndavélarnar síðustu tvö árin. Vöktunin er unnin í nánu samstarfi við aðrar náttúrustofur en nú eru vaktaðir 12 staðir víðsvegar á landinu.